Questions & Answers - July 18, 2017

Anonymous: Swami jee Shatpath Brahmin (3/1/2/21) ka arth batyein?
Swami Ramswarup: Jo prashan aapne kiya hai, weh ek gyanvardhak katha ke madhyam se dev aur asur ke baare mein kaha ja raha hai. Is katha ko Shatpath Brahmin Granth 3/2/1/18 se 3/2/1/30 tak pado. Tab samajh mein aayega.

CK: Maharaj ji pranam agr hmere bhr hawan ke liye jagah na ho to kya room pe kr skte hai?? kya iseka benifits milega? agr dailly gavertri mantro se hawan ke bd bhi hmeri choti wish puri nhi hoti. to iseka reason kya hoga ? hmere paap jyda hai last born ke? for example meri wish hai mera koi frnd hai mujhse bte nhi kreta . maine bhut kosis kr le manane ke fir bhi bte ni kreta . ab me cheta hu wo phele cll pe bte kre.. bt 2 saal se daily dono time hawan kr rha . bs ye he wish mangeta bt aaj tk puri nhi hui.. kya maharaj khabhi puri hogi? sry aap se asa qus pucha..
Swami Ramswarup: My blessings to you. Room mein bhi haven ho sakta hai, agar aapko diwarein dhooyein se kaali hone par koi aitraaz na ho. Han! Iske poorey benefits milenge. Is vishaye mein mein ek article paste karta hoon-

Ishwar dwara updesh kee hui kewal ek hee Pooja hai, weh hai- ek nirakaar Ishwar kee Pooja. Parmeshwar sadaa ek ras rehta hai arthat nirakaar, sarvashaktimaan, sarvavyapak, srishti rachyita aadi anant gunn yukta hai aur uske swarup, gunn, karma, swabhaav kabhi nahin badaltey. Isee Ishwar kee jub sadhak vedanusaar pooja karta hai arthat ek ved sunta hai aur samajh kar uspar acharann karta hai, Ishwar naam ka nitya smarann karta hai. Teesra, Ashtang Yog sadhna karta hai, chautha- Nitya agnihotra aur Acharya ke paas jaakar yajyen karta hai aur is vedic Pooja par kisi bhi sthiti mein sanshaye nahin karta- Shraddha rakhta hai aur mata-pita, atithi, guru kee sewa karta hai to nishchit hee samay aaney par uske dukhon ka naash hota hai. Jaise ki yajurved mein kaha- “vitt yajyen kalpantaam” arthat Yajyen dwara dhan badta hai.” “aayu Yajyen kalpantaam” arthat yajyen se aayu badtee hai, “Swaha Yajyen Kalpantaam” arthat dukhon ka naash hokar sukh prapt hota hai.

Shraddha ka arth hee yahi hai ki ek baar jub ved sun-sunkar shrat+dha- Satya samajh mein aa jaye aur weh gyan Jeevan mein dharann kar liya jaye to usey Shraddha kehte hain. Jubtak satya, ved, nirakaar Parmeshwar, prakriti aur Bhagwan ke swarup, gunn, karma aadi Ved sun sunkar samajh nahi aaye tab tak sadhak ka chitta sthir nahi hota, mann chanchal rehta hai aur naastikwaad tatha astikwaad donon taraf mann-buddhi vichaar kartee hai, ek taraf sthir nahin ho paatee. Mukhyataha anadi evum avinashi satya Bhagwan, Yajyen aadi samajh nahi paatee atah jub tak Shraddha pakki na ho jaye, sadhak ko upar kee sadhna arthat mukhyataha ved sunna aur yajyen karna ityadi chchodna nahi chahiye kyunki shabdon dwara yeh pramaanit hai ki Ved Ishwareeya vanni hai jisey Sri Krishna Maharaj, Sri Ram etc., sabhi ne apnaya aur jub Sri Ram jaison par vipatti aayee arthat Rajya chchodkar chaudha varsh vanon mein jaana padaa aur wahan Sita ko Ravann chura le gaya tub bhi Valmiki Ramayan mein Sri Ram ne rotey hue yahi kaha ki Hey! Laxman, mera durbhagya dekho ki Rajya chchin gaya, Sagey-sambandhi door ho gaye, Sita ko Ravann chura le gaya aadi. Hey! Laxman, main samajhta hoon ki is bhoomandal par mere samaan paap karne wala paapi purush koi nahin hai kyunki ek ke baad ek dukhon kee na tootney walee parampara nirantar mere hriday aur mann ko cheer daltee hai. Poorva janam mein main eek ke baad ek bahut se paap kiye hain. Unhee paapon ka phal aaj mujhe prapt ho rahaa hai aur mere upar bahut dukh aa rahe hain. Main itna bhagyaheen hoon ki yadi main Samundra mein kood jaoon to mere dukhon se samundra bhi sookh jayega.

Vichaarneeya vishaye yahi hai ki Sri Ram ne Yajyen ko, vedon ko, Rishiyon ko, Mata-Pita aadi kisi ko bhi dosh nahin diya kewal apne bhagya ko hee dosh diya. Phalswarup weh prithvi kee ek mahaan vibhutee kehlaye hain. Kisi bhi paristhiti mein ved, Ishwar aadi ko dosh nahin dena chahiye.

Yajyen/havan, vedic marg par chalkar jeev apna agla janam dev yoni mein nischit kar leta hai aur phir vedic bhakti karke apne paapon ka naash karta hai. Yadi weh vedic marg par nahin chalega, yeh sochkar ki jub pichchley janamon ke karmon kee sazaa hee bhognee hai to na koi pichchley janam ka phal nasht hoga aur na hee agla janam dev yoni mein hoga. Apitu manushya deh ka durupyog karke weh jeev-prakriti chakra mein phansa jaata hai arthat manushya ka sharer to usey milta nahin. Uske sthan par usey pashu-pakshi, keet-patang kee yoniyon mein jaakar kasht uthana padta hai. Yajyen, Yogabhyas aadi jo vedic upasana/Pooja upar updesh kee hai, weh nisswarath hotee hai. Uske phal kee ichcha nahin hotee. Jaise ki Sri Krishna Maharaj ne kaha ki Hey! Arjun, tera karma karne mein adhikaar hai, phal kee ichcha mat kar etc. Yajyen se sukh nahin mila, yeh swarthyukta evum sanshaye yukta bhakti hai. Aisee bhakti sukh nahin detee. Ved marg par chalkar sadhak ko atal Shraddha aur astha kee avashyakta hotee hai.

Jo insaan ved nahin sunega, usey yeh pataa hee nahin chalega ki shubh karma kaun se hain aur ashubh karma kaun se. Aisey manushya ko ved avidyagrast manushya kehte hain. Isliye manushya ka sharer paakar ke jeev ka yeh dharma hai ki weh ved marg par chale.

Pichchley janam ke paap Yajyen karne se aur yogabhyaas karne se pehle dheele padte hain aur phir nasht ho jaate hain. Isliye vidwanon ka ashray lekar nitya ved sunna, Ashtang Yog kee sadhna karna, Ishwar naam ka jaap karna aur ved mantron se havan/yajyen karna, Mata-Pita aur guru etc., kee sewa karna laabhdayak hai. Aisa karne se shubh kaamnayein poorna hotee hain. Vedanusaar yeh niyam hai ki jo prarthna, havan ke saath-saath us prarthna aur kaamna ko poorna karne ke liye purusharth bhi karta hai tub weh kaamna pooree hotee hai. Kewal havan evum prarthna se kuch nahin hota, purusharth bhi karna hota hai, tub prarthna prabhaav daltee hai aur kaamna poornna hotee hai.